近排喺英國倫敦佳士得拍賣會上，就有一件引人注目嘅畫作以高價拍出，呢件就係阿史之前介紹過嘅《庫圖比亞清真寺宣禮塔》，呢幅畫作原本係英國政治家邱吉爾喺二戰期間創作，本身係贈送畀時任美國總統羅斯福，但後來就成為荷里活女星安祖蓮娜祖莉嘅收藏品，近來就再次以高價易手。提起邱吉爾，相信大家都會知道佢以79歲之齡拎到諾貝爾文學獎，但畫畫又係幾時開始嘅呢？今次阿史就同大家介紹下啦！

據了解，其實邱吉爾一生就畫過500幾幅畫作，但佢並唔係由細開始畫起，而係喺佢41歲先至開始認真執筆畫畫。喺1915年嘅時候，當時邱吉爾嘅身份就係海軍大臣，但就因為決策失誤強奪奧斯曼帝國海軍軍艦而令到奧斯曼帝國加入德軍陣營對抗英國，邱吉爾仲更加喺1915年伊斯坦布爾加里波利戰役慘敗，因而被免去海軍大臣職務。

喺呢個時候，政壇失意嘅邱吉爾就見到莊園弟妹高妮喺度寫生，而高妮亦都送咗一個水彩盒畀邱吉爾，自此邱吉爾就迷上水彩畫、油畫，出訪嘅時候都會帶埋畫具，政壇失意反而煥起咗佢嘅藝術世界，真係估佢唔到！

原圖嚟自網絡